Myndugleikarnir í Grønlandi hava í dag leitað eftir einum flogfari, sum møguliga er dottið niðu í økinum kring Nuuk.

Enn er ógreitt, hvussu nógv fólk vóru umborð og hvat hettar er fyri eitt flogfar.

Umfatandi leiting var sett í gongd í økinum kring Nuuk. Eftirlitsskipið hjá Arktisk Kommando Knud Rasmussen er eisini til staðar í økinum, skrivar Sermitsiaq.

Steðgað var at leita klokkan 21.20 og byrja verður aftur í morgin.

Talan er um eitt “illgrunasamt niðurdottið útlendskt flogfar”, sum er horvið av radaranum, skrivar Sermitsiaq

Flogferðslutænastan Naviair, sum hevur ábyrgdina av at stýra flogferðsluni í Grønlandi, boðaði Sermitsiaq frá, at talan er um eitt flogfar við einum motori.

Bjargingararbeiði fór fram á landi, sjógvi og úr luftini, og heitt var á borgarar á staðnum um at halda seg burtur frá økinum, meðan leitingin fór fram.