Open Doors International er missiónsfelag, sum stuðlar kristnum, sum verða forfylgd og dripin kring allan heimin. Tey skriva á teirra heimasíðu, at talið av kristnum, sum verða dripin fyri sína trúgv í Nigeria, er í minking.

Men samanumtikið er harðskapurin ímóti kristnum í Afrika – serliga frá Sahara og suðureftir – framvegis verri enn aðrastaðni í heiminum.

Í Sudan herjar eitt borgarakríggj, sum hevur sent milliónir til rýmingar og dripið túsundtals. Hetta hevur ført til eina støðu við lutvísum lógloysi nógvastaðni og ført til, at kristin verða dripin vegna teirra trúgv.

Talið av dripnum kring heimin er tó fallið úr 4.998 í fjør niður í 4.476 í ár.

Hetta kemst einans av, at talið av dripnum kristnum í Nigeria er minkað – úr 4.118 í fjør til 3.100 í ár. Hetta er lægsta talið síðan 2020.

Samstundis vaks talið av dripnum kristnum í restini av heiminum.

3.775 er talið fyri kristin, sum eru rænd.

209.771 eru flýdd frá húsi og heimi. 

7.699 kirkjur og kristin samkomustøð eru álopin ella tvingsilstongd.

4.744 kristin eru handtikin, dømd, fongslað ella varðhaldsfongslað uttan rættarfund.