Í fjør var Matvørubreytin í Tekniska Skúla Klaksvík, við í einari Norðurlendskari verkætlan, ið kallaðist Taste of The Nordics.

Lærari og næmingar á kokkaskúlanum áTekniska Skúla Klaksvík, TSK,  fóru í fjørheyst til Noregs, har føroysku næmingarnir arbeiddu saman við kokkanæmingum úr Íslandi og Noregi. Næmingarnir borðreiddu við siðbundnum mati úr teimum trimum londunum og í tí sambandi varð ein dokumentarfilmur gjørdur av verkætlanini. Filmurin kann síggjast her: the film 

Filmurin varð tilnevndur eina heiðursløn í felagsskapinum, International Institute of Gastronomy, Culture, Arts and Tourism, ella IGCAT.

Og á World Gastronomy Summit 2025 í Barcelona, varð filmurin heiðraður sum vinnari í bólkinum, Educating for the future.

Eitt endamál við IGCAT er at varpa ljós á týdningin av siðbundnum og burðardyggum matvørum úr ymsum heimspørtum.

Hetta er beint í samsvari við eitt aðalmál hjá kokkaskúlanum, har føroysk matmentan er ein týðandi partur av undirvísingini í kokkaútbúgvingini, sigur skúlin í tíðindaskrivi.