Á sosialu miðlunum hevur tað verið nógv prát, nú KÍ lýsir við, at dysturin í Ungarn í kvøld verður vístur í Varpinum, og at gjald verður tikið fyri at koma inn.
Í dag greiðir Rói Clementsen, sum er ein av ábyrgdarmonnunum í KÍ, frá, hvussu tað fíggjarliga hongur saman í sambandi við dystirnar í Europa á útivølli og heimavølli.
Rói Clementsen skrivar soleiðis:
Góðu fjepparar!
Eg fái javnan spurningar um sjónvarpsrættindi: Hvar kann mann síggja KÍ? Hví kostar tað? Og hví so nógv?
Hjá KÍ er stutt frá nevnd til fjepparar, so her er ein greið frágreiðing um, hvussu tað gongur fyri seg.
Skyldan hjá KÍ
Tá KÍ luttekur í altjóða kappingum, er tað eitt krav, at felagið tryggjar sjónvarpsframleiðslu og at signalið kann sendast út í heim.
• Í Champions League og Europa League er altíð krav um VAR. (Video dómarar)
• Í Conference League er tað krav frá 3. umfari.
Hetta merkir, at framleiðslukrøvini eru nógv hægri – og kostnaðurin er fleiri hundrað túsund krónur. Í Føroyum er tað bara KVF, sum hevur neyðugu útgerðina og førleikarnar. Men sum nú til seinasta dyst, hava nógv starvsfólk hjá KVF verið í feriu, og tí má KÍ leiga fólk úr Danmark.
Heimadystir
KÍ eigur rættindini fult og heilt til heimadystirnar og selur tey til útheimin. Eg forhandli við keyparar fyri hvønn dyst – prísurin er ógvuliga ymiskur og veldst um mótstøðuliðið.
Í Føroyum:
• Fyrr hava bæði Televarpið og KVF keypt rættindini.
• Í 2023 og 2024 vísti KVF flestu dystirnar hjá KÍ ókeypis.
• Í ár hevur KVF ikki keypt rættindini, so vit hava brúkt okkara egna KÍ Varpið til at vísa dystirnar.
Vit kundu latið KVF dystin ókeypis at vísa, men tað er ikki fíggjarliga burðardygt. Okkara skylda mótvegis limunum í KÍ er at reka felagið skynsamt.
Útidystir
Rættindini til útidystir eiga mótstøðuliðini.
• Tá eg byrjaði í KÍ í 2019 var tað vanligt, at fjepparar als ikki kundu síggja útidystirnar.
• Nú keypir KÍ rættindini, so vit kunnu vísa dystirnar í Føroyum.
• Onkuntíð hevur KVF eisini keypt rættindini saman við KÍ (t.d. Molde 2023).
Ofta eru rættindini avmarkað til bert Føroyar, onkuntíð til øll Norðurlond – eg royni altíð at fáa Norðurlond við, men tað er ikki altíð møguligt.
Vit seta eisini krøv til góðsku: bæði myndagóðsku og at hava góðan vert við viðmerkjara. Hetta krevur teknikara og framleiðslu, sum eisini kostar pening.
Tí kostar tað at síggja dystirnar á KÍ Varpinum, um ikki onkur annar (t.d. KVF ella Televarpið) keypir rættindini frá okkum.
Góðan dyst í kvøld – og takk fyri stuðulin!
Dysturin sæst á tv.ki.fo
Dysturin millum FK Neman úr Hvítarusslandi og KÍ verður klokkan 19 í Szeged í Ungarn.
