Sum tað er nevnt fleiri ferðir, skal Smyril í dokk seinni í mánaðinum og sostatt verður tað grikska ferjan, Galaxy, sum skal røkja suðuroyarsiglingina í tær 8-10 vikurnar, Smyril er burtur.
Galaxy siglur væl seinni enn Smyril og sostatt fær hon bara siglt tveir túrar um dagin. Strandferðslan hevur lagt eina ferðaætlan fyri Galaxy har hon fer hvønn morgun av Krambatanfa klokkan sjey á morgni.
Men hetta hevur elvt til misnøgd summastaðni, eitt nú lukkast tey ikki til Havnar, sum skulu møta til eitthvørt um morgunin, tí Calaxy leggur, í fyrsta lagi, at í Havn klokkan 9.30.
Men kanska verður ferðaætlanin broytt, tí Niels Juel Arge, stjóri á Strandferðsluni, sigur, at nú verður kannað eftir um tað letur seg gera at flyta fráferðina av Krambatanga ein tíma aftur, so at Galaxy fer klokkan seks um morgunin heldur enn klokkan sjey, sum ferðaætlanin nú sigur.
– Hugt verður eftir, hvussu tað fer at ávirka ferðaætlanina sum heild, og siglingina annars, at Galaxy fer av Krambatanga klokkan seks um morgunin, sigur hann.
Hann sigur, at verandi ferðaætlan, har loyst verður klokkan sjey, er sama ferðaætlan, sum var galdandi tá ið Galaxy var her seinasrt, tað var í 2017. Og tað er eisini sama ferðaætlan var galdandi fyri Prince, tá ið hann avloysti Smyril í 2019.
Men tá ið Herjólfur avloysti Smyril í 2022, var fyrsta fráferðin av Krambatanga klokkan seks á morgni.
Eitt, Strandferðslan skal hugsa um í hesum sambandi eru tær kravdu hvílitíðirnar hjá manningini og nú verður so mett um, antin tað letur seg gera at framskundað fráferðina úr Suðuroy um morgunin.
Annars er Galaxy á veg til Føroyar, og tað er grikska manningin, sum siglur hana til Føroyar. Hon loysti úr Perama í Grikkaaloysti mánakvøldið, og á vegnum legði hon at á Malta at bunkra.
Beint nú fara tey fram við Portugal og væntandi Galaxy á Krambatanga sunnudagin. So skal skipið riggast til, áðrenn hon fer undir Suðuroyarsiglingina leygardagin 23. august.
Smyril siglur seinasta túrin av Havnini eftir ferðaætlanini fríggjakvøldið klokkan 18.30, men so er túrurin norður aftur klokkan 21, avlýstur.
Galaxy tekur so við siglingini leygarmorgunin tíðliga.
Men fortreytin er, at ein loysn fæst á ósemjuni ímillum Maskinmeistarafelagið og Skipara- og Navigatørfelagið øðrumegin, og lønardeildina hjá Fíggjarmálaráðnum hinumegin.
Tey bæði manningarfeløgini nokta limum sínum at fara umborð á Galaxy fyrr enn ein sersáttmáli er gjørdur fyri skipið, og trygd skal eisini fáast fyri, at grikska manningin er lønt eftir føroyskum sáttmálum ímeðan tey eru her.
Samráðingar eru ímillum partarnar, men enn er eingin loysn. Jan Mortensen, leiðari á Lønardeildini, sigur, at fæst eingin loysn, verður málið lagt fyri Gerðarrættin, tí tey halda ikki, at tiltakið hjá manningarfeløgunum er lógligt.
Les meiri um tað her: https://dimma.fo/grein/suduroyarsiglingin-i-vanda-i-ringasta-fori-endar-osemjan-um-galaxy-i-raettinum
