Eftir at Lasse Svan fyrr í ár kunngjørdi, at hann nú fer at gevast við at spæla hondbólt, so hevur Flensburg-Handewitt leitað eftir nýggjum manni. Nú er eftirmaðurin funnin. Tað er føroyski Jóhan á Plógv Hansen, sum skiftir frá TSV Hannover-Burgdorf, og hevur skrivað undir ein trý-ára sáttmála við Flensburg-Handewitt.
– Hetta er eitt stórt ynski hjá mær, ið nú gongur út. Eg ynski at gera mítt til, at góða gongdin í søguríka og úrslitagóða felagnum heldur fram, sigur Jóhan á Plógv Hansen við heimasíðuna hjá Flensburg.
Venjarin hjá Flensburg-Handewitt, Maik Machulla, er eisini nøgdur, nú felagið hevur skrivað undir við føroyska vongspælaran.
– Eg eri glaður fyri, at Jóhan hevur valt at spæla fyri okkum. Eftir at Lasse (Svan, red.) kunngjørdi, at hann gevst at spæla eftir hetta kappingarárið, hava vit leitað nágreiniliga eftir hansara eftirmanni. Jóhan er ein av teimum bestu á sínum plássi og passar perfekt inn í okkara spæliskipan, sigur venjarin við heimasíðuna.
Til ber at lesa alla søguna á heimasíðuni hjá Flensburg-Handewitt (á týskum, red.) her:
