Um tú nýtir Internet Explorer og hevur vitjað eitt nú www.dimma.fo, so sært tú, at myndir og tekstur hava hug at skrambla saman.
Nú eru fimm ár gingin, síðani Microsoft tók lívið av Internet Explorer og ikki ger nógv við at viðlíkahalda kagan. Edge er komin ístaðin fyri.
Meðan nógv eru farin at brúka kagar, sum eitt nú Google Chrome, Firefox og Edge, so eru tað enn summi, ið halda seg til Explorer.
Explorer er vandamikið og ótrygt
Internet Explorer kann ikki longur kallast ein browsari, sambært altjóða stjóranum fyri teldutrygd hjá Microsoft, Chris Jackson. Tað kann rætt og slætt vera vandamikið at nýta Internet Explorer í 2020.
- Vit kunnu ikki longur standa inn fyri Explorer. Vit liva ikki longur upp til aðalkrøvini við hesum kaganum, og hóast nógvar heimasíður framhaldandi rigga fínt, so testa og viðlíkahalda flestu framleiðarar ikki Internet Explorer í dag. Heldur verður testað og viðlíkahildið við nútíðarhóskandi browsarum.
Jackson sigur, at ein gott kann brúka Internet Explorer til einkultar leitingar, men hann mælir frá, at nýta Internet Explorer sum høvuðsbrowsara.
Dátueftirlitið mælir eisini fólki frá at nýta Internet Explorer. Hetta, tí at trupulleikar eru við trygdini. Mælt verður til at nýta aðrar kagar. Heilt ítøkiliga merkir tað, at teldusníkar og illviljaðar heimasíður hava lætt við at smitta tína teldu við telduvirusum og øðrum, ið kann stjala týdningarmiklar upplýsingar frá tær.
Kelda:
The Verge og Dátueftirlitið
