Uttanríkis- og vinnumálaráðið hevur nú sett Drós í Ólavsstovu í starv sum ráðgevara í Mat- og tilfeingishúsinum.

Drós er fiskivinnutøkningur og hevur eisini hægri útbúgving í matvørugóðsku og matvørutrygd. Hon hevur drúgvar royndir sum ráðgevari innan framleiðslu og góðskuskipanir á virkjum, sum menna matvørur, fóður og aðrar vørur úr fiski, kjøti og plantum.

Tey siga í tíðindaskrivi, at fremsta uppgávan hjá henni verður at menna kveikjandi karmar fyri mat- og tilfeingismenning í góðum samstarvi við granskarasetrið iNOVA, sum er eitt tvørfakligt granskingarumhvørvi fyri biotøkni.

Vit skulu fáa mest møguligt burturúr okkara rávørum og vit skulu minka ikki koyra so nógvan mat í skrell, sigur Drós í Ólavstovu í tíðindaskrivi frá Vinnumálaráðnum.

Samstundis skulu vit verða meiri sjálvbjargin við føroyskum mati og menna nýggjar burðardyggar vørur, so at Føroyar verða eitt fyrimyndarligt samfelag, har einki tilfeingi fer til spillis.

Nevndin fyri granskarasetrið iNOVA hevur nú gjørt av at leggja størri dent á at menna nýggjar vørur úr okkara ríka tilfeingi.

Hetta nýggja endamálið hóskar sera væl til ætlanirnar hjá bæði Vinnumálaráðnum um at menna fleiri landbúnaðarvørur, og hjá Fiskimaálaráðnum um at gagnnýtslu alt, sum kemur upp á land av fiski, og at virðisøkja tilfeingið úr sjónum.

Drós tekur við starvinum 1. september, sigur Vinnumálaráðið í tíðindaskrivi.