Hetta er bara fyri at borgarstjórin kann sleppa at ferðast nakrar ferðir.
So bersøgin er Tróndur Sigurðsson, býráðslimur fyri Kommunulistan.
Ein meiriluti í býráðnum hevur samtykt, at Tórshavnar kommuna skal melda seg upp í felagsskapin, Arctic Mayor forum, AMF, sum er ein felagsskapur fyri borgarstjórar úr ymsum kommunum í arktiska økinum. Endamálið er at samskifta og hittast av og á at tosa um ymisk mál.
AMF varð stovnað í 2019 og tá vóru 11 kommunur við. Ein av stovnandi kommununum var Tórshavnar kommuna, men í 2021 samtykti Tórshavnar kommuna at fara úr aftur felagsskapinum, tí tey hildu, at tey fingu ov lítið burtur úr, umframt at tað heldur ikki er heilt ókeypis.
Men nú hevur so meirilutin í býráðnum samtykt, at Tórshavnar kommuna skal fara upp í aftur.
Býráðslimir, sum eru ímóti at fara upp í aftur, vístu á, at hetta er ikki ein felagsskapur fyri høvuðstaðir, so fyri tað kundi tað akkurát tað sama verið onkur onnur kommuna í Føroyum, sum var við.
Somuleiðis vísti Heðin Mortensen á, at tað er ein líknandi felagsskapur fyri høvuðstaðarkommunur í arktiska økinum.
Men har sleppur Tórshavnar Kommuna ikki við tí vit eru ikki eitt sjálvstøðugt land. Tað er eingin undirtøka fyri at loyva Tórshavnar kommunu við, hvørki úr Dannark, Svøríki ella úr Íslandi, og tað irriteraði hann út um alt mark
Limagjaldið er ásett eftir fólkatalinum í teimum ymsu kommunum og hjá Tórshavnar kommunu 22.500 krónur um árið.
Somuleiðis væntar felagsskapurin, at limakommunurnar taka lut í arbeiðnum hjá AMF og tí verður helst eisini onkur uttanlandsferð hjá borgarstjóranum og øðrum umboðum frá kommununi.
– Hetta luktar meiri av, at borgarstjórin vil sleppa at ferðast enn tað luktar av politikki, heldur Tróndur Sigurðsson.
Og hann heldur eisini, at hetta er eitt umhvørismál, tí tað er ikki nógv, sum er so dálkandi sum at flúgva.
– Hetta eru burturspiltir pengar, og minnir mest um pamparí, heldur hann.
Eisini partamaðurin, Kári Johansen, heldur, at hetta er at oyðsla við almennum pengum.
Hann heldur, at býráðið skuldi heldur brúkt pengarnar at sett eina vaskikonu í starv á onkrum stovni hjá kommununi.
Høgni Vilhelmsen, býráðslimir fyri Fólkaflokkin ivast í, um hetta er tann rætti felagsskapurin, og um hetta eru teir røttu spælivinirnir hjá okkum, sum hann orðaði seg.
Hetta sigur mær einki sigur hann, og tað er hin fólkafloksmaðurin, Birgir Nielsen, samdur í.
Hesum er Elsa Berg ikki samd í. Hon sigur, at hetta knýtir kommunurnar saman og tað eru eisini viðurskifti, har vit kunnu læra av hvørjum øðrum.
Tað hevur ongantíð verið so viðkomandi at vera við í arktiskum samstarvi, heldur hon.
Hon ásannar, at onkrar ferðir verða, men annars fer tað mesta samskifti, og fundarvirksemi á telduni.
Hon sigur, at sjálvt um hetta kostar nakað av pengum, kann Tórshavnar kommuna spara stórar upphæddir við at læra av mátanum, aðrar kommunur hava loyst ymisk mál upp á. Við at skifta um vitan, kunnu vit sleppa undan nógvum kanningum og nógvum fyrireikandi arbeiði, sum eisini kostar pengar, sigur hon.
– Hetta snýr seg ikki um at borgarstjórin skal at ferðast í tíð og úrtíð, tí nógv arbeiðið er á internetinum, sigur Elsa Berg.
Vit skulu ikki smæðast at vera ein partur av einum samstarvi í Arktisk, sigur hon.
Í 2024 vóru 19 limir í AMF. Nakrar av kommunum, sum eru við eru Yellowknife í Kanada, Fairbanks og Utqiagviq í USA, Harsted, Sortland, sør-Varanger og Tromsø í Noregi, Kemi, Tornio og Oulu í Finnlandi, Umeå og Luleå í Svøríki, Akureyri í Íslandi og Qeqertalik í Grønlandi.
Endamálið við felagsskapinum er at geva lokalu stjórnunum í Arktis ein leiklut í menningini av Arktiska økinum, sum í løtuni hevur ein vaksandi áhuga millum fleiri av heimsins stórveldum.
Høvuðsskrivstovan hjá AMF er í Tromsø í Noregi og har er eitt fólk í fulltíðarstarvi umframt eitt annað starvsfólk, sum ikki arbeiðir fulla tíð. Felagsskapurin er við í fleiri ES verkætlanum um at menna arktiska øki
á burðardyggan hátt, og í samsvari við ynskjunum hjá borgarunum.
Í 2023 gjørdi AMF av, at heilsa og trivnaður hjá fólkinum í Arktisk var eitt evni, tey skuldi leggja dent á hesi næstu árini, og at ungdómurin í Arktisk skuldi hava ein berandi leiklut.
Tá ið avtornaði, varð málið samtykt við átta atkvøðum fyri. Tey, sum atkvøddu fyri, vóru Elsa Berg, Heidi Lava Elgeirsdóttir, Annita á Fríðriksmørk, Anja Weyhe, Kristianna Winther Poulsen, Bergur Robert Dam Jensen, Guttormur í Skála og Sunnvá Dahl Høgfeldt.
Fýra atkvøður vóru ímóti og tey vóru Tróndur Sigurðsson, Kári Johansen, Høgni Vilhelmsen og Birgir Nielsen.
Fyrrverandi borgarstjórin, Heðin Mortensen, atkvøddi blankt.
