Klaksvíkar býráð hevur nú hevur sett Sonna Óla Djurhuus í starv sum kommunustjóri í Klaksvíkar kommunu.

Tað sigur býráðið á heimasíðuni

Sonni er útbúgvin lærari í 2003. Hann hevur tikið BED í pedagogiskari leiðslu á Fróðskaparsetur Føroya í 2020. Harumframt hevur hann eisini aðrar viðkomandi útbúgvingar.  

Sonni er 51 ár og hevur drúgvar leiðslu- og stjóraroyndir hjá tí privata og tí almenna.

Hann hevur verið handils- og deildarleiðari í handilsvinnuni, og hevur í fleiri umførum verið skúlastjóri.

Eitt nú stóð hann fyri at leggja saman tríggjar skúlar, til tað vit í dag kenna sum Skúlan við Streymin í tíðarskeiðinum 2016 til 2023.

Síðani 1. apríl 2023 hevur Sonni verið stápsleiðari í sjúkrahúsverkinum.

Sonni sigur sjálvur, at nú fer hann at brúka hesa næstu tíðina at seta seg inni í viðurskiftini í kommununi og tosa við politikarar, leiðarar og starvsfólk bæði í fyrisitingini og á stovnum í kommununi.

– Síðani fara vit saman at seta á skrá, hvat vit raðfesta at arbeiða við komandi fimm árini, sigur hann við heimasíðuna.

Sonni tekur við starvinum 1. februar næsta ár.