Sunnudagin verður minningarhald fyri børn, sum vit hava mist. Minningarhaldið verður í Havnar Kirkju sunnudagin klokkan 16.
Fyrireikararnir siga, at øll eru vælkomin á gudstænastu, har Ólavur Eysturdal, prestur, fer at prædika og Hervør Sabina fer at syngja. Og aftan á gudstænastuna verður ein drekkamunnur í Kirkjustovuni
Minningarhaldið verður sum ein vanliga gudstænasta. Áðrenn gudstænastuna, frá klokkan 15.30, er høvi hjá teimum, sum vilja, at tendra ljós fyri barninum tey hava mist og vit minnast tey í kvirru.
Fyrsta minningarhaldið av hesum slagi var Minningarhald var í novembur í 1997. Undirtøkan var so mikið góð, at avgjørt var at gera hetta til ein vakran og afturvendandi sið, har øll kunnu minnast mista barn sítt - sama nær, og í hvørjum sambandi, barnið er mist.
– Tá ið vit missa eitt barn, missa vit ein part av okkum sjálvum. Ein part av okkara framtíð, ein part av okkara samleika. Vit náddu at knýta sterk bond til børn okkara, annað hvørt tey vóru fødd ov tíðliga, til tíðina ella vit hava livað saman við teimum, siga fyrireikararnir.
– Saman minnast vit tey farnu børnini við einum dámi av góðsemi og fløvan, einum siði við ritualum, ið er við til at binda bond ímillum fortíð og framtíð.
– Í dag liva vit í eini mentan, har vit dagliga skulu vísa skjótleika og framfýsni, sum prógv uppá, at vit liva lívið til fulnar.
– Vit geva okkum ikki stundir at dvølja og sansa. Henda sterka kenslan av felags lagnu, gevur bæði foreldrum og avvarðandi stundir til at minnast børnini, ið fingu eitt alt ov stutt lívsskeið.
– Tá ið vit tendra ljós fyri børnum okkara, er tað eitt tekin um kærleika og at børn okkara enn lýsa í hjørtu foreldranna, siga fyrireikararnir.
