Vaktarhaldið hjá Vørn til sjós er avmarkað. Tað staðfestir Jóhan Christiansen, landsstýrismaður í fiskivinnumálum, fyri Løgtinginum í dag.
Hann hevur latið Løgtinginum eina frágreiðing um føroysku fiskivinnuna.
Í tí sambandi vísir hann á, at Føroyar Noreg, ES, Bretlandi, Íslandi og Grønlandi, hava avtalað at fult eftirlit skal vera við fimm prosentum av landingunum og 7,5 prosentum av nøgdini, sum verður landað av uppsjóvarfiski í Føroyum.
Tað tað er fult eftirlit, merkir, at í hesum førum skal eftirlitsfólk vera til staðar alla tíðina, meðan landað verður.
Í 2023 fekk fiskiveiðieftirlitið játtan at seta tvey eftirlitsfólk afturat, og tveir eygleiðarar í fast starv og tað hevur bøtt um umstøðurnar at útinna hetta eftirlitið.
– Hetta merkir, at Vørn er betur ført fyri at halda hesa avtaluna, og tað er ikki nógv, ið restar í, til vit klára at hava ta eftirlitið, sum eru avtalað við onnur lond, sigur landsstýrismaðurin.
Enn er tað kortini neyðugt av og á at nýta manningar á Brimli og Tjaldrinum at gera kanningar á landi.
At reiðarin ber útreiðslurnar av at hava eygleiðarar umborð, og at tveir eygleiðarar eru í føstum starvi, bøtir um møguleikarnar at reka fiskiveiðieftirlit til havs, sigur Jóhan Christiansen.
Hann sigur, at eygleiðarar frá Vørn vóru nakrar ferðir umborð á russiskum og føroyskum fiskiskipum í fjør, men har var alt eftir forskriftunum.
Men tá ið talan er um eftirlit til sjós, er virksemið avmarkað. Orsøkin er, at Tjaldrið er bara mannað helvtina av árinum, tí játtan ikki er til tvær manningar, sigur landsstýrismaðurin í fiskivinnumálum.
Harumframt má Tjaldrið liggja nógv meira enn ætlað av tekniskum trupulleikum og øðrum trupulleikum, ið standast av, at skipið er so gamalt.
Tjaldrið varð bygt í 1976, og tað gerst støðugt truplari at útvega eykalutir til skipið. Næstan hvørja ferð onkur umvæling skal gerast, vísir tað seg, at tær verða meiri umfatandi enn væntað.
– Umframt at hetta ger eftirlitið til sjós minni effektivt, er tað eisini sera kostnaðarmikið og tíðarkrevjandi at halda Tjaldrið í tí standi, sum neyðugt er, fyri at tað framhaldandi skal lúka altjóða krøv til handilsskip, sigur Jóhan Christiansen.
Men hann sigur, at sama støða er so smátt eisini farin at gera seg galdandi við Brimli, sum nú er 25 ára gamal.
– Skipið er slitið og krøvini til viðlíkahald eru støðugt vaksandi, fyri at tað framhaldandi skal lúka øll krøv, sigur landsstýrismaðurin.
Hann sigur, at nú krevur tað so nógv at halda útsíðurnar á Brimli, at hann liggur alsamt fleiri dagar, tí slíkt viðlíkahald bara kann gerast í turrum og góðum veðri.
– Støðan versnar støðugt, so hvørt sum skipið eldist, sigur Landsstýrismaðurin.
Føroyar hava avtalur við onnur lond, har vit hava bundið okkum til at hava eftirlitsskip í altjóða sjógvi í ávís tíðarskeið, tá nógv virksemi er í økinum.
Men tað avtaluna klára vit ikki at halda tí Vørn heldur, at sum støðan er nú, er tað ikki forsvarligt at senda eftirlitsskipini til hesar uppgávurnar.
Orsøkin eru partvís trupulleikarnir við Tjaldrinum. Men ein annar trupulleiki er, at Brimil er einasta okkara vaktarskip í fullari drift, samstundis sum at hann eisini er ein partur av okkara tilbúgving tá ið ræður um leiting og bjarging á sjónum.
Ein uppgáva, sum Brimil eisini fer at hava frameftir, er at basa oljudálking og kemikaliudálking á sjónum. Hesa uppgávu fer Brimil at hava afturat, tí helst kann útgerðin ikki brúkast umborð á Tjaldrinum, sigur Jóhan Christiansen.
