Í nøkrum umførum hava fólk frá Havstovuni merkt springarar í Føroyum. Tilsamans eru 23 springarar merkir við sendara og Havstovan sigur í dag, at hetta hevur givið teimum nýggja, og sera týdningarmikla vitan um springara.

Eitt nú hevur tað áður verið upplýst, at fyri at kunna veiða burðardygt, hevur tað stóran týdning at vita, talan er um ein stovn, sum heldur til beint her, rundan um Føroya, ella um talan er ein felags stovn, sum ferðast víða.

Og nettupp hesir springarnarnir, sum eru merktir í Føroyum, vísa, at springari ferðast rættiliga víða, heilt tvørtur um Atlantshav.

Í eini nýggjari frágreiðing sigur Havstovan, at nú hava vit, á fyrsta sinni, fingið innlit í, hvussu ferðingarmynstrið er hjá springarum, sum eru merktir á føroyska landgrunninum.

Sendararnir vísa, at springararnir spjaðast skjótt eftir at teir vórðu merktir - ólíkt grind, sum heldur saman í bólki.

Sum tey kanska høvdu væntað, ferðast springararnir nógv kring Landgrunnin og í Hetlandsrennuni.

– Meira forkunnugt er, at fleiri springarar hava miðvísa kós vestur í hav, tá ið komið er út á heystið, sigur Havstovan.

Teir svimja sunnan fyri Ísland, vestur á landgrunnin við Eysturgrønland, og ferðast so suður í ein meldur, miðskeiðis í Irmingerhavinum.

Nógvir og kaldir vindar skapa nógva blanding upp og niður ígjøgnum sjógvin á hesum leiðum. Og økir um mattilfeingið upp gjøgnum sjógvin.

– Og springararnir kava djúpt, ofta djúpari enn 400 m, og ein kom heilt niður á 616 m, sum er met, sigur Havstovan.