Tað er nú greitt, at tað verður Torkil Tórgarð, sum verður nýggjur stjóri á Føroya Fólkaháskúla.
Tað komu 15 umsóknir til starvið sum háskúlastjóri, og stjórnin hevur valt at seta Torkil Tórgarð at leiða háskúlan komandi fimm árini.
Torkil Tórgarð er føddur í 1990 og verður sostatt 35 ára gamal, tá hann tekur við sessinum 1. septembur. Hann hevur fjølbroyttar royndir á føroyska mentanarpallinum, serliga innan filmslist og leiklist, og hann hevur eisini fingist við at skriva og menna filmsleikrit og leikrit annars.
Hesi seinastu árini hevur hann nomið sær útbúgving í sálarfrøði og samskifti, og er um at vera liðugur við útbúgving í sosialsálarfrøði og læring.
Nýggi stjórin ætlar at leggja serligan dent á sambondini ímillum menniskja og samfelag, og hvussu mennandi og samansjóðandi tilgongdir verða skaptar í sosialum umhvørvum. Hann ætlar at halda fram við nógvum av tí dygdararbeiði, sum undanfarnir stjórar hava lagt eftir seg, og at menna skúlan víðari sum eitt kveikjandi tilboð í føroyska samfelagnum, sigur stjórnin fyri háskúlan í tíðindaskrivi.
Hesi seinastu árini hevur háskúlin lagt dent á at bjóða nám innan listarligu greinarnar, og tað fer framhaldandi at síggjast aftur, men nýggi stjórin fer harumframt at stremba eftir at fjøltátta virksemið á stovninum og at skapa opin rúm, har alskyns virksemi verður hýst, og bæði vistarnæmingar og almenningur sleppa at royna seg í ymsum høpum.
Torkil Tórgarð loysir Hedvig Westerlund-Kapnas av, sum hevur verið stjóri síðani september 2019. Á fólkafundinum á háskúlanum á ólavsøku verður høvi at heilsa upp á bæði farandi og komandi stjóran.
