Í kvøld savnaðust fólk í hundraðtali í hjartanum í Keypmannahavn, á Ráðhúsplássinum, fyri at hátíðarhalda jødisku hátíðina hanukkah.

Minningarhaldið fer fram nakrar dagar eftir eitt líknandi tiltak í australska býnum Sydney, har eitt yvirgangsálop kravdi lívið av 16 fólkum – teirra millum ein tíggju ára gomul genta.

Tøgn var í ein minutt fyri teimum deyðu á Bondi Beach.

– Í Sydney sóu vit tað myrkastu síðuna av menniskjum. At taka lívið av øðrum bara orsakað av teirra trúgv, segði høvuðsrabbinin Jair Melchior av pallinum.

Felagsskapurin Chabad Danmark, sum stendur aftan fyri almenna hátíðarhaldið í Danmark, hevur verið í tøttum sambandi við bæði løgregluna í Keypmannahavn og fregnartænastuna hjá donsku løgregluni PET, síðan álopið. Trygdin er tí økt undir tiltakinum í kvøld.

– Vit eru serliga varin og meta áhaldandi um tørvin á okkara hjáveru, soleiðis at tiltøk kunnu fara fram á friðarligan og skipaðan hátt og við fokusi á trygdina hjá luttakarunum, sigur løgreglan við B.T.