Klokkan 19 fer finski dómarin Mohammes Al-emara at bríksla fyri fyrstu ferð á Tórsvølli, har tað er altjóða dystur. Tað er B36, sum eigur heimavøll í Conference League, og mótstøðuliðið er Rijeka úr Kroatia.

B36 hevur longu fyrr í summar tvær ferðir megnað at vinna seg víðari í kappingini, og nú verður roknað við, at mótstøðuliðið úr Kroatia er væl stinnari, enn Paida úr Estlandi og Haverfordwest úr Wales, sum B36 longu fyrr í summar hevur varpað úr kappingini.

B36 venjarin Dan Brimsvík hevur sett liðið. Merkisvert er tað, at Hannes Agnarsson aftur í kvøld er fremsta maður, og at álopsspælarin Valerijs Sabala er á beinkinum. Sonni Ragnar Nattestad er í miðverjuni saman við Isak Jönsson og Magnus Egilsson. Tað ber við sær, at Andrias H. Eriksen er á beinkinum.

Jann J. Benjaminsen er vongverji í vinsta borði í 5-4-1 leikskipan, og tað ber við sær, at Bjarki C. Nielsen, sum hevur verið rættiliga drúgvur millum teir fyrstu ellivu, í kvøld er á beinkinum.

B36 – HNK Rijeka (1-1)

Conference League

B36: Mattias H. Lamhauge – Símun Sólheim, Isak Jönsson, Sonni Ragnar Nattestad, Magnus Egilsson, Jann J. Benjaminsen – Andrass Johansen, Eli Falkvard Nielsen Taufee Skandari, Michal Przybylski – Hannes Agnarsson

Á beinkinum: Silas Eyðsteinsson, Hans Jørgensen, Andrias H. Eriksen, Bjarki C. Nielsen, Valerijs Sabala, Benjamin Heinesen, Marrias Hellisdal, Emil Weihe Joensen, Lukas Giessing, Erlendur Magnusson, Aron Knudsen