Avgerðin er eitt týðandi stig fyri at styrkja heilsutænasturnar í økinum og geva borgarum betri atgongd til tænastur nær heimstaðnum.

Heilsumiðstøðin er felags ogn hjá Hovs, Porkeris, Sumbiar og Vágs kommunum. Kommunurnar hava í felag sett pening av til prosjekteringina, sum fer í gongd beinanvegin. Endamálið er at leggja grundarlagið fyri eina framtíðar útbygging.

Betri tænastur og karmar

Seinnu árini eru fleiri ábøtur gjørdar á heilsumiðstøðini. Kommunurnar siga, at tær vilja halda fram við arbeiðinum. Málið er at dagføra karmarnar, so teir samsvara betur við tørvin hjá borgarum og teimum tænastum, sum verða veittar.

Í dag eru longu nógvar tænastur knýttar at miðstøðini. Við einari útbygging verður møguleiki at víðka virksemið og leggja fleiri tænastur nærri borgarunum. Hetta kann lætta um gerandisdagin og styrkja heilsuverkið í økinum.

Fyrsta stig í størri ætlan

Prosjekteringin fer at leggja dent á tørv, arbeiðsumstøður og framtíðar menning. Hetta er fyrsta stig í einari størri ætlan um at menna heilsutænasturnar í sunnara parti av landinum.
Forkvinnan í Sosialu og heilsunevndini, Rakul Nolsøe í Lágabø, og borgarstjórin, Bjarni Johansen, siga, at tey eru fegin um avgerðina. Tey vísa á, at tað hevur stóran týdning, at tænasturnar fáa betri og tíðarhóskandi umstøður.