Tað verður ikki Framsókn, ið fer at bjarga samgonguni, nú Miðflokkurin hevur tikið seg úr samgongusamstarvinum.

Tað sigur Ruth Vang, forkvinna í Framsókn.

Jenis av Rana varð fyrr í dag koyrdur frá sum landsstýrismaður í uttanríkis- og mentamálum, og seinnapartin í dag gjørdi Miðflokkurin afturfyri greitt, at flokkurin tekur seg úr samgonguni.

Samgongan er tí slitnað og samgongumeirilutin er farin.

Tað er rættiliga ósannlíkt – fyri ikki at siga púra ósannlíkt – at Tjóðveldi ella Javnaðarflokkurin fara at bjarga samgonguni, og Ruth Vang ger nú eisini greitt, at hennara flokkur er ikki sinnaður at hjálpa samgonguni.

Við Dimmalætting sigur Ruth Vang, at løgmaður fekk møguleikan fyri einum ári síðani at koma í samgongu við Framsókn, men tá skuldi ”ruddast borð”, og samgongan skuldi skipast av nýggjum.

Tað var í kjalarvørrinum av óskilinum, ið valdaði eftir at Johan Dahl og Annika Olsen høvdu atkvøtt fyri málinum um sammøður.

- Nú er ov seint, sigur Ruth Vang og ger greitt, at Framsókn ætlar sær ikki upp í nakað samstarv við núverandi samgongu.