Føroyskur dansifilmur á altjóða støði
Tá Vinnuforum 2025 verður í Kongshøll í Sjóvinnuhúsinum fríggjadagin 10. oktober, fara Rannvá Káradóttir og Marianna Mørkøre at leggja fram um sítt arbeiði við filmsverkætlanini RAMMATIK, sum hevur vakt ans langt uttan fyri landoddarnar.
RAMMATIK varð sett á stovn í 2008 og hevur síðani arbeitt við at varpa ljós á føroyska filmslist og menna føroysku filmsverðina við føroyskt framleiddum dansifilmum. Verkætlanin hevur vunnið altjóða virðislønir fyri sín serliga stíl og sterku myndagongd, har dansur og filmur verða flættað saman á nýskapandi hátt.
Verkætlanin fevnir bæði um filmsframleiðslur og livandi framførslur, og við nýskapan, áhaldni og dirvi hava Rannvá og Marianna prógvað, at tað ber til at skapa føroyska dansifilmslist á altjóða støði. Filmarnir hjá teimum hava verið vístir á fleiri stórum filmsfestivalum kring heimin.
Á Vinnuforum fara tær at greiða frá arbeiðinum handan RAMMATIK og sínum royndum við at skapa føroyska list, ið røkkur út um landamørk.
Vinnuforum 2025, sum verður í Kongshøll í Sjóvinnuhúsinum fríggjadagin 10. oktober kl. 13:00–15:30, samlar á hvørjum ári íverksetarar, vinnulívsfólk, myndugleikar og áhugaði til íblástur, orðaskifti og netverkan. Í ár verður serligur dentur lagdur á nýskapan, samstarv og kveikjandi søgur úr føroysku vinnuni.
Tiltakið er ókeypis, og tað eru Tórshavnar kommuna og Hugskotið, sum skipa fyri.
Les meira og melda til á: www.hugskotid.fo/events/vinnuforum
