Føroyar stóðu fyri slottum avriki, men úrsliti gjørdist eitt 2-1 tap móti Slovakia – hóast Føroyar veruliga góvu bólkavinnarunum ein dyst at minnast.
Avgerandi máli kom stutt eftir føroyskan samstoyt, sum endaði við túri í sjúkrabili.
Áðrenn seinasta dystin í Nations League-bólkinum, hevði Slovakia ikki tapt eitt einasta stig – og hevði eitt ótrúligt málúrslit á 25-0. So tá Slovakia kom á odda longu eftir 10 minuttir, sá tað tungt út.
Men føroyska liðið svaraði sera væl aftur og tók tamarhald á dystinum. Tíggju minuttir áðrenn hálvleik eydnaðist tað eisini: bólturin fór fyri fyrstu ferð í kappingini í málið hjá Slovakia. Tað var – enn eina ferð – Ásla Johannesen, ið skoraði fyri Føroyar, eins og hon eisini gjørdi í javnleikinum móti Moldova fríggjakvøldið.
Støðan 1-1 helt sær leingi, og í veruleikanum kundi tað líka væl verið Føroyar, ið fóru avstað við sigri. Vit byrjaðu 2. hálvleik væl og skaptu fleiri góðar møguleikar – hóast Slovakia hevði meira av bóltinum, vóru tað vit, ið høvdu flestu málmøguleikarnar.
Men Slovakia vildi hava øll stigini við sær heim, og í 88. minutti fekk Ludmila Matavkova avgjørda málið. Hon fekk bóltin eftir at hann brast í eitt føroyskt bein inni í brotsteiginum – og hóast tað sá út sum hon kundi vera rangstødd, varð málið góðkent. Harvið gjørdist endaliga úrslitið 2-1 til Slovakia.
