At kvinnulandsliðið í hondbólti avrikaði so væl og vann EM undankappingardystin í Íslandi hevur av álvara vakt ans.
Tað sæst aftur í áhuganum fyri EM undankappingardystinum ímóti Montenegro, sum verður klokkan 19 í kvøld. Hondbóltssambandið sigur, at tað enn eru nøkur atgongumerki eftir, og at tað eru nógv atgongumerki seld, síðani kvinnurnar avrikaðu so væl í Íslandi.
Hondbóltssambandið heitið á áskoðararnar um at møta í góðari tíð í høllini við Tjarnir.
HSF skrivar soleiðis:
Kvinnurnar eru til reiðar og dyrnar við Tjarnir lata upp longu kl. 16.30 og byrjar dysturin kl. 19.00. Í høllini verður møguleiki fyri at keypa sær okkurt at eta og drekka, eisini verður andlitsmáling og sølu av fjepparalutum.
Kom í góðari tíð.
Roknast kann við, at nógv ferðsla verður niðan til høllina, tí er umráðandi, at áskoðarar møta í góðari tíð.
Á vøllinum verður avbjóðingin uppaftur størri, enn hon var í Íslandi mikukvøldið, tá ið Føroyar fyri fyrstu ferð – og í 24. Royndini – vunnu kvinnulandsdyst ímóti Íslandi.
Síðani Montenegro var sjálvstøðugt land í 2006 hava kvinnurnar verið við í øllum EM og HM endaspølum síðani 2010, og í 2012 vunnu tær EM. Síðsta stóra avrikið var í 2022, tá ið Montenegro vann bronsu í EM endaspælinum.
