Tey, sum passa onkran av sínum nærmastu heima, fara nú at fáa hægri endurgjald fyri mista arbeiðsinntøku.

Eirikur í Jákupsstovu, landsstýrismaður í almanna- og mentamálum, fer nevnilig at leggja uppskot fyri Løgtingið seinni í heytst um at bøta um fíggjarligu støðuna hjá teimum, sum missa arbeiðsinntøku í sambandi við sosialar hendingar.

Endurgjald fyri mista arbeiðsinntøku verður veitt í sambandi við ansing av barni við varandi sjúku ella breki, ella tá ið persónur við seinaheilaskaða verður ansaður í heiminum.

Tað verður eisini latið fyri at ansa doyggjandi undir fólkapensjónsaldri, og tá barn yngri enn 18 ár doyr ella er deyðføtt.

Verandi skipan hevur við sær, at nógvar familjur eru fyri inntøkumissi, hóast tey fáa endurgjald fyri mista arbeiðsinntøku, sigur hann.

Landsstýrismaðurin sigur, at avmarkingin hevur við sær, at tað - í ov stóran mun - eru fíggjarlig atlit, sum avgera, hvussu familjur leggja ansingina til rættis, og endamálið við uppskotinum er sostatt at geva familjunum størri frælsi at skipa seg. 

Frá 1. januar 2026 er sostatt ætlanin, at hægst møguliga endurgjald fyri mista arbeiðsinntøku hækkar úr 27.779 krónum til 31.000 krónur um mánaðin, umframt frítíðarløn og bundið eftirlønargjald.