Nú fer Løgtingið at lata eina eykajáttan so at Dalstunnilin kann verða liðugur í ár. Tað hevur Ruth Vang, landsstýriskvinna í fíggjarmálum, nú lagt uppskot fyri løgtingið um.

Hon sigur, at Dalstunnilin kann verða liðugur at taka í brúk í heyst, men skal tað eydnast, verður neyðugt við eini eykajáttan og tað hevur hon nú biðið Løgtingið um.

 Dalstunnilin er 2,2 kilometrar langur, og samstundis skulu 300 metrar av vegi gerast til og frá tunlinum.

Harumframt er ein stórur partur av verandi vegum í Húsavík og í Dali breiðkaðir. Grót frá tunlinum er eisini brúkt til at leggja eitt stórt sving á Skálavíkarvegnum, um.

Í fjør varð arbeitt við vegagerð í tunlinum, portalum, umframt at tunnilin varð tryggjaður so at grót ikki rapar á vegin og tað ikki lekur undan loftinum.

Men tað varð ikki heilt liðugt og í ár er ætlanin, at arbeiðini verða gjørd liðug, umframt at arbeitt verður við at leggja tekniskar installatiónir í tunnilin, bæði trygdarútgerð og ljós. Harumframt skal vegurin í tunlinum asfalterast.

Í løtuni verður arbeitt við at gera eina vegagrøv til dren og kaðalar, tað er Sev, samskiftiskaðalar og kaðalar til trygdarútgerðina í tunlinum.

Farið er undir at gera portalin Dalsmegin, og síðan verður portalurin gjørdur Húsavíkarmegin og væntandi verða tey arbeiðini liðug í summar.

Somuleiðis verður styrkilag lagt á vegbreytina, og síðani verður vegurin í tunlinum, og uttanfyri tunnilin, asfalteraður.

Ein nýggj kostnaðarmeting sigur, at alt arbeiðið fer at kosta 173 milliónur. Fram til árslok 2024, vórðu 110 milliónir brúktar til tunnilin.

Í ár eru 35 milliónir at arbeiða fyri. Tunnilin kann takast í brúk í heyst, men tað er treytað av at írestandi játtanin, sum er upp á 28 milliónir, verður játtað nú í vár.

Og tað er hetta, Ruth Vang nú hevur lagt uppskot fyri Løgtingið um at játta.