Í gjár varð løgreglan boðsend í FK í Hoyvík, tí at fólk høvdu verið inni har og stolið.

Men løgreglan sigur, at tá ið eldri mál um stuldur í FK eru gjøgnumgingin á vakmyndatólum, tók málið eina heilt nýggja vend.

Tað vísir seg nevniliga, at somu fólk hava verið heilar 20 ferðir í FK í Hoyvík og stolið - og tað er alt hent hesar seinastu vikurnar.

Talan er um vaksin fólk, ein mann og eina kvinnu. Tey hava bæði beinleiðis stolið vørur, men so hava tey eisini verið so snúðin, at tey hava stolið vørur, men hava latið tær innaftur við teirri grundgeving, at talan var um feilkeyp - og so hava tey fingið pengarnar aftur, sum vøran kostaði - hóast hon altso er stolin.

Løgreglan sigur, at fólkini eru avhoyrd og so leyslatin aftur, men tet eru skuldsett fyri allan stuldurin. Tey siga, at stuldurin er nakrar hundrað krónur hvørja ferð, so tilsamans er talan um eina trivaliga upphædd.