Tað hevur verið serstakliga friðarligt hjá løgregluni í nátt. Eftir halgidagslógini var ikki lógligt at dansa ella at spæla livandi tónleik aftan á midnátt, so tað merkti náttarlívið.

Kortini fekk ein maður 1.500 krónur í bót tí hann var so ólátaður, at hann var til ampa fyri fólk.

Og í gjárkvøldið stoyttu tveir bilar saman á Hvítanesvegnum. Annar bilurin kom yvir í skeiva vegbreytt og koyrdi á ein bil, sum kom ímóti honum.

Løgreglan kannar nú, hví óhappið hendi.