Bretar eru farnir úr ES, og í tí sambandi hevur Vørn samskift við bretskir myndugleikar um at skipa eftirlit við fiskiskapinum hjá hvørjum øðrum.

Men enn ber ikki til at siga, hvussu langa tíð hetta tekur, og hvat kostnaðurin verður, hevur Jóhan Chrstiansen, landsstýrismaður í fiskivinnumálum, upplýst fyri Løgtinginum í dag.

Men hann sigur, at bretar hava boðað frá, at næsta ár verður tað ein treytunum fyri føroyskum fiskiskapi eftir uppsjóvarfiski í bretskum sjógvi, at skipini skulu hava vakmyndatól umborð, soleiðis at bretar síggja, hvat er farið fram.

Tá ið Bretland tók seg úr ES, var annars neyðugt at gera eina fyribils avtalu við bretar, men  báðir partar eru samdir um at fáa eina varandi skipan, ið lýkur treytirnar fleiri ár fram.

Samstundis hevur ES eisini boðað frá, at øll viðurskifti í samband innflutning av fiski og fiskavørum til ES, fara at verða broytt.

ES hevur boðað føroyskum myndugleikum frá, at næsta ár skulu øll, ið ætla sær at flyta fisk, ella fiskaúrdráttir, til eitt ES-land lúka aðrar og strangari treytir enn tær, sum nú eru galdandi.