Í uppskotinum til fíggjarætlan fyri 2026 hjá Tórshavnar kommunu verða inntøkurnar mettar til 1,5 mia. krónur. Hetta er ein inntøkuvøkstur uppá 5,4%.

Útreiðslurnar verða mettar til 1,14 mia. krónur, sum er ein vøkstur uppá 4,9%.

Størsti útreiðsluvøksturin kemur av stórum lønarvøkstri, eftir at nýggir lønarsáttmálar eru gjørdir, og øktum virksemi.

Uppskotið til fíggjarætlan gevur 263 mió. krónur til skattafíggjaðar íløgur. Av hesum fer ein stórur partur til almanna- og heilsuøkið, har byggingin av einum nýggjum røktarheimi í Stórubrekku er byrjað. Harumframt verða pengar settir av til ein nýggjan Eldradepil í Kollafirði, sum eisini er ein partur av ætlanini hjá býráðnum at gera íløgur í bygdirnar í kommununi.

Pengar verða eisini settir av til dagføringar og tillagingar á dagstovnaøkinum, bæði til spælipláss og til innandura umstøður hjá børnunum.

Arbeiðið við at dagføra kloakkskipanir og við at halda spillivatnsætlanina heldur fram, og íløgur verða gjørdar í orku- og umhvørvisátøk.

Og pengar verða eisini settir av til Oyggjaleikirnar, sum verða í Føroyum í 2027, og har nógv av virkseminum verður í Havn.

Í fíggjarætlanini verður lagt upp til, at kommunuskatturin uppá 19% verður óbroyttur, og tað sama verður barnafrádrátturin, sum er 9.000 krónur.

Miðað verður eftir at føra eina skynsama fíggjarstýring, og við einum rakstrarúrsliti uppá slakar 314 mió. krónur, verður hesin setningurin hildin.