– Í løtuni herjar eitt stórt og álvarsamt álop í Føroyum á SMS-boðum og teldupost.
Tað siga tey í Talgildum Føroyum, umframt allir peningastovnarnir, og løgreglan
Í hesum sambandi fáa fólk eini SMS-boð við leinkjum í, har tey royna at lokka persónligar upplýsingar frá teimum.
Endamálið er at fáa atgongd til gjaldskort ella netbanka fyri at ræna pening.
Í SMS-boðunum er eitt leinki. Trýstir tú á leinkið, kemur tú inn á eina heimasíðu, ið líkist einari veruligari føroyskari heimasíðu, eitt nú hjá einum banka, posthúsi ella nethandli.
– Har verður tú biðin um at upplýsa kortnummar, loyniorð ella at rita inn við Samleikanum.
Ofta nýr tað um at rinda eina smávegis upphædd.
Men fólk skulu endiliga IKKI trýsta á nakað, uttan at hugsa seg sera væl um.
Soleiðis kunnu eini sms-boð síggja út, har roynt verður at lumpa fólk. Men undirskriftin er avdúkandi, tí brævið er undirskrivað »Ærliga Posta Føroya«
Nøkur góð ráð:
– Trýst ongantíð á leinki í SMS-boðum: Myndugleikar og peningastovnar biðja teg ONGANTÍÐ um at rita inn ella upplýsa loyniorð gjøgnum eitt leinki í einum SMS ella telduposti.
– Góðkenn ONGANTÍÐ við Samleikanum, um tú ikki sjálv/ur ritar inn: Hevur tú ikki sjálv/ur sett eina gerð í gongd, skal ein áheitan á Samleika-appina ongantíð góðkennast.
– Steðga á og hugsa teg um: Hevur tú havt nakað samskifti við sendaran í seinastuni? Væntaði tú at fáa hesi boðini? Hevur tú biðið um at fáa eitt leinki sendandi?
– Kanna heimasíðuna: Í staðin fyri at trýsta á leinkið, far so beinleiðis inn heimasíðuna hjá fyritøkuni (skriva adressuna í kagan).
– Kanna sendaran: Hygg at telefonnummarinum, teldupostinum og leinkinum. Ofta sær tað misvísandi út, hóast navnið á sendaranum sær rætt út.
Hvat skalt tú gera, um tú hevur trýst á leinkið?
Hevur tú illgruna um, at tínar kortupplýsingar eru misnýttar:
– Rita inn á netbankan og sperra kortini alt fyri eitt.
– Ring til bankan, um tú sært óregluligt virksemi í netbankanum.
– Hevur tú illgruna um Samleikan: Far undir stillingar og vel Endurnýggja – Samleikan. Fylg mannagongdini, og vel nýtt loynital.
Starvsfólk hjá peningastovnunum og Talgildu Føroyum arbeiða saman við fjarskiftisveitarum og kt-veitarum at steðga álopinum, verður sagt í ávaringini.
