Boð komu frá Buckingham Palace á BBC í dag:

– Hansara hátign er í dag farin undir formligar málsviðgerðir um at taka tignarheiti og heiðurslønir frá Andrew prinsi.

Andrew prinsur verður framyvir kendur sum Andrew Mountbatten Windsor. Leigumálið hjá Royal Lodge hevur higartil veitt honum lógarverju og innivist.

Formlig fráboðan um uppsøgn av leigumálinum er nú komin, og hann skal flyta í annan privatan bústað.

Hesi revsitiltøk verða mett at vera neyðug – uttan mun til at hann framvegis avsannar ákærurnar móti sær.

Teirra hátignir, Charles og Camilla, ynskja at gera greitt, at djúpasta samkenslan hevur verið – og framvegis fer at vera – við teimum, sum hava verið misnýtt.

Nú Andrew ikki er prinsur longur, noyðist hann at venja seg við eitt annað navn: Andrew Mountbatten Windsor.

Fyrrverandi prinsurin hevur verið umgirdur av gølum seinastu árini. Eitt tað mest umrødda er vinabandið við kynsbrotsmannin Jeffrey Epstein og málið við Virginia Giuffre, sum ákærdi hann fyri at hava seksuelt misnýtt hana, tá ið hon var 17 ára gomul.

Familjan hjá Virginia Giuffre hevur reagerað upp á avgerðina og kallar hana fyri ein sigur fyri nú deyðu kvinnuna.

Royal Lodge, Sandringham

Sky News skrivar, at Andrew fer at flyta til eina ogn á privata Sandringham-bústaðnum í Norfolk. Bústaðurin verður goldin av konginum.

Hildið verður, at Charles eisini fer at geva Andrew eina privata fíggjarliga veiting.