Á býráðsfundi í dag fer Runavíkar býráð at taka støðu til tilmæli frá teknisku deild at bjóða stóra grundstykkið í Leitinum út sum alment útboð. Freistin at bjóða verður ásett til 14 dagar.

Eingin ivi er um, at býráðið fer at samtykkja tilmælið frá teknisku umsiting, tí byggi- og býarskipanarnevndin tekur undir við tilmælinum frá teknsiku deild.

Fyri umleið fýra árum síðani gjørdi kommunan eina avtalu við Sp/F í Leitinum. Verkætlanin bleiv ikki gjøgnumførd, og fyritøkan hevur boðað kommununi frá, at man hevur slept ætlanini. Ti er tað, at býráðið í dag fer at taka støðu til tilmæli um av nýggjum at bjóða lendið út.

Býráðsfundurin hjá Runavíkar býráð í dag verður klokkan 17 í býráðssalinum, sum er í gamla skúlanum á Glyvrum.