Tann 4. desember í fjør varð Brian Thompson skotin og dripin á gøtuni í New York. Hann var stjóri í fyritøkuni UnitedHealthcare, størsti heilsutryggjarin í USA.

Luigi Mangione varð fáar dagar seinni handtikin í samband við drápi. Sambært ákærunum hevði hann hjá sær fleiri skriv, har hann ilskaðist inn á amerikanska heilsuverkið og tryggingarfyritøkurnar, sum hava yvirskot á fleiri milliardir dollarar hvørt ár, meðan túsundtals sjúklingar doyggja tí tey ikki hava ráð til viðgerð.

Tað eru eisini nógv fólk sum hava stuðlað Mangione síðani hann varð handtikin. Men Pam Bondi, ið er hvat svarar til løgmálaráðharri í USA, hevur nú biðið ákærumyndugleikar um at krevja deyðarevsing móti Mangione, skrivar The Guardian.