ADHDvitan er ein røð av evnisdøgum, har ADHD felagið bjóðar granskarum, fakfólkum og øðrum lyklapersónum at fara í djúpdina við evnum, ið hava við ADHD at gera.
Tiltakið hesuferð verður í morgin leygardagin 11. apríl 2026 kl. 15:00–17:45 í Auluni í Finsen í Havn.
Tórunn H. Ósá kemur at leggja fram nýggj tøl úr sínari Ph.d.-verkætlan. Tórunn er RN, cand.scient.soc., námslektari og Ph.d.-lesandi, og granskar í børnum við neurologiskum sjúkum í Føroyum – serliga svøvntrupulleikum hjá børnum við NDD. NDD (nevroútviklingstrupulleikar) er eitt felagsheiti fyri ymiskar diagnosur, sum ávirka menningina hjá børnum – til dømis ADHD og autisma.
Tórunn fer millum annað at greiða frá títtleikanum av ADHD og autismu hjá børnum og ungum í Føroyum frá 2004 til 2022, og hvørjar fylgisjúkur kunnu standast, tá útgreiningin kemur ov seint.
Samstundis vísir granskingin á týdningin av at seta inn so tíðliga sum gjørligt – bæði fyri einstaka menniskjað og samfelagið.
Við hesi Ph.d.-granskingini fáa vit lokalt grundað hagtøl, djypri innlit og betri amboð, sum kunnu hjálpa okkum at seta inn við meira neyvum og røttum átøkum til gagns fyri øll við ADHD í Føroyum.
Endamálið er at breiða nýggjastu gransking og fakligu vitanina um ADHD á føroyskum og við støði í føroyskum viðurskiftum. Tiltakið verður stroymt og goymt í vitanarsavninum.ADHD og verður stuðlað av Team Rynkeby, Tórsgøtu og MEGD.
Tiltakið er fyri øll, sum hava áhuga ella arbeiða við fólkum við ADHD/ADD – og tað er ókeypis
