Tað verður neyvan, at vit fara undir Suðuroyartunnilin í hesum valskeiðnum.
Tað staðfesti Ruth Vang, forkvinna í Framsókn, og landsstýriskvinna í fíggjarmálum, á ársfundi hjá Framsókn leygardagin.
Hetta valskeiðið endar 8. desembur næsta ár, tá ið løgtingsval verður aftur.
Hetta er ikki í samsvari við tað, aðrir polikarar halda, tí tey hava vónir um at taka endaliga støðu til tunnilin áðrenn løgtingsvalið næsta ár.
Annars varð tað umrøtt at gera vegir og arbeiðspláss á Skarvanesi og í Sandvík, og at gera portalarnar lidnar frammanundan
Tað var fyri at spara tíð, men tað verður av ongum
– Okkum dámar uppskotið betri nú, fyrst og fremst tí tað er avmarkað til fyrireikingar- og útbjóðingina.
– Portalar og arbeiðsvegir sum vóru partar av upprunaliga uppskotinum eru ikki við í nýggju útgávuni, sum er løgd fyri Løgtingið, staðfestir forkvinnan í Framsókn.
Hon vísir annars á, at nógv kjak, og nógv ósemja, er um linjuføringarnar, serliga í sambandi við Skúgvi og ferðsluna á Sandi.
– Tað er torført hjá okkum leikfólki at taka dagar ímillum, tá tey kønu eru ósamd, sigur Ruth Vang.
Hinvegin heldur hon, at kostnaðurin hevur fylt lítið í kjakinum í seinastuni, og tað kemur óvart á hana.
Ein orsøk er sjálvandi, at vit kenna ikki endaliga kostnaðin, fyrrenn tunnilin er bjóðaður út, sigur hon. Men hon heldur, at fá munnu tó vænta, at metti kostnaðurin upp á fýra milliardir fer at halda.
Spurningurin er, hvussu nógv kemur omaná og hvar markið liggur, sigur hon.
Eg eri fullgreið yvir, at nógv fólk eru stúrin um hesa verkætlanina og at hon verður ov dýr, og at hon fer at forkoma okkum fíggjarliga, sigur Ruth Vang.
– Eg skilji væl tann óttan, og vit eru einasti flokkur, sum ikki hevur givið bindandi lyfti um at tunnilin skal gerast, leggur hon afturat.
Hinvegin hevur Framsókn bundið seg til at gera tað fyrireikandi arbeiði, sum krevst fyri at koma til eina niðurstøðu um tunnilin skal gerast, ella ikki.
Men hon væntar heldur ikki, at tað fyrireikandi arbeiðið verður liðugt í hesum valskeiðnum, og tí er ivasamt um endalig støðu verður tikin fyrr enn eftir næsta løgtingsval.
Hinvegin leggur hon eisini dent á, at tað hevur stóran týdning at taka sær neyðuga tíð til fyrireikingina.
– Gransking vísir, at verða fyrireikingarnar skundaðar ígjøgnum, hevnir tað seg ofta aftur seinni, sigur hon.
Ruth Vang sigur, at sum frálíður fara vit eisini at fáa eina greiðari mynd av, um vit fáa loyst haldføristrupulleikarnar í búskapinum.
– Tað skal ongin ivi vera um, at fyri okkum í Framsókn er tað ein grundleggjandi treyt fyri at fara undir eina so stóra verkætlan, sigur Ruth Vang.
