Heimskenda bretska sjónleikakvinnan Maggie Smith er deyð 89 ára gomul.
Tað upplýsir familjan fyri Sky News.
Maggie Smith vaks upp í Ilford í Essex í Onglandi og fór úr skúlanum sum 16 ára gomul fyri at fylgja dreyminum um at verða sjónleikari. Hon byrjaði at spæla sjónleik í 1950'unum og fekk drúgva yrkisleið. Hon hevur verið virkin til nýliga og hevur verið vird sum sjónleikari.
Mong kenna hana helst sum Minerva McGonagall í Harry Potter-filmunum ella sum herligu Violet Crawley í sjónvarpsrøðini Downton Abbey.
Maggie Smith vann tvær Oscar heiðurslønir, fýra Emmy heiðurslønir og eina Tony heiðursløn. Hon vann eitt nú Oscar heiðursløn sum besti sjónleikari fyri avrikið í filminum The Prime Of Miss Jean Brodie frá 1969.
Synirnir, Chris Larkin og Toby Stephens, upplýsa fyri Sky News, at mamman doyði á sjúkrahúsi.
– Hon var saman við familju og vinum seinastu løtuna. Eftirsitandi eru eitt nú tveir synir og fimm ommubørn.
