Næstu dagarnar er nógvur fótbóltur í heimligu kappingunum á skránni.
Mikudagin og hósdagin verður fyrsta umfar í kappingini um løgmanssteypið, og sunnudagin og mánadagin verður sætta umfar í Meistaradeildini.
Í dag vann Víkingur trivaligan 4-0 heimasigur móti AB, sum annars hevur staðið seg væl higartil í ár. Longu hóskvøldið hittast Víkingur og AB aftur. Tá verður tað í steypakappingini, og tá verður tað eisini í Sarpugerði.
Í dag var HB leingi í trongum skóm við Margáir, har EB/Streymur 18 minuttir undan leikloki legði seg á odda við brotssparki, sum Búi Egilsson umsetti til mál. So pressaði HB, og tað eydnaðist at skora tvey mál, sum Noah Mnenéy og Ári Mohr Jónsson skoraðu.
Mikudagin fær HB í steypakappingini vitjan av B71, og EB/Streymur fær hósdagin vitjan av NSÍ.
Í dag vann NSÍ tryggan 2-0 heimasigur ímóti 07 Vestur. Tað vóru Petur Knudsen og Klæmint A. Olsen, sum tíðliga í seinna hálvleiki skoraðu málini.
Sigurin í dag ber við sær, at NSÍ er topplið í Meistaradeildini við 13 stigum, KÍ hevur 11 stig, og HB hevur 10 stig.
Í gjár var tað vónbrot hjá B36, at tað endaði málleyst á heimavølli ímóti Skála, sum vann ársins fyrsta stig. B36 fer mikudagin til Vágs at spæla steypadyst móti FC Suðuroy. Skála fer hósdagin at spæla steypadyst á útivølli móti 07 Vestur.
Einasti steypadystur millum tvey feløg, har hvørki er í bestu deildini, verður mikudagin, tá ið FC Hoyvík fær vitjan av TB.
Mikudagin verður KÍ stórfavorittur á heimavølli móti ÍF, og B68 verður stórfavorittur á heimavølli móti MB, sum er aftast í 2. deild.
Løgmanssteypið 1. umfar
Mikudagin 15. apríl
FC Suðuroy – B36: Árni Brandsson Petersen kl. 15.00
FC Hoyvík – TB: Jóhan Hendrik Ellefsen kl. 17.30
KÍ – ÍF: Heini Z. Viðoy kl. 18.30
HB – B71: Dagfinn Forná kl. 18.30
B68 – MB: Rani Andrasson Skaalum kl. 18.30
Hósdagin 16. apríl
Víkingur – AB: Jákup Øssursson Mohr kl. 18.30
EB/Streymur – NSÍ: Eiler Rasmussen kl. 18.30
07 Vestur – Skála: Bjarki Danielsen kl. 18.30
