Fyrrapartin í gjár varð boðað frá einum ferðsluóhappi í Miðvági. Óhappið hendi tá ið ein bilur og ein skutari stoyttu saman.
Førarin á skutaranum var ein ungur drongur og hann varð fluttur á Landssjúkrahúsið til kanningar. Løgreglan sigur, at tá ið skutarin varð kannaður eftir óhappið, vísti tað seg, at hann var útboraður, tí hann kláraði at koyra nógv skjótari enn loyvt er.
Annars varð eisini ringt til løgregluna at boða frá, at eldur var í einum hjalli í Saltangará. Sløkkiliðið varð sent á staðið, men løgreglan sigur, at talan var um at eigarin hevði fresa inni í hjallinum.
Í tí sambandi vóru sagispønir farnar ímillum skins og hold, og tær høvdu verið so heitar, at tað festi í. Men eigarin hevði sløkt eldin sjálvur, so har var eingin skaði.
Løgreglan mátti eisini eftir nøkrum ungdómum, sum gjørdu fortreð í miðbýnum í Havn. Tey settu keylur á vegin í Steinatúni og forðaði ferðsluni, men tá ið løgreglan kom á staðið, vóru tey horvin.
Stutt eftir gjørdu ungdómar eisini fortreð við at kasta egg upp eftir rútunum á einum sethúsum har í grannalagnum, men eisini hesa ferð vóru tey langt at landi skotin, tá ið løgreglan kom fram.
