Beint eftir midnátt var løgreglan í Norðoyatunlinum, og har mátaðu tey ferðina á einum bili, sum koyrdi alt ov skjótt. Har er loyvt at koyra 80, men tað vísti seg, at hesin koyrdi heilar 106 kilometrar um tíman. Tað gevur eitt klipp í koyrikortið.
Men tá ið hann kom úr tunlinum í Klaksvík, og skuldi ígjøgnum víðagitnu rundkoyringina við húkinum, koyrdi hann øvugtan veg ígjøgnum - og tað gevur eisini eitt klipp í koyrikortið.
Tá ið løgreglan so steðgði honum, og kannaði umstøðurnar, vísti tað seg, at bilførarin var bara 18 ár, og sostatt hevði hann akkurát fingið koyrikort.
Tey fyrstu trý árini, ein bilførari hevur koyrikort, eru at rokna sum ein royndartíð og tá skal nógv minni til fyri at missa tað aftur.
Og tað var júst tað, sum hendi í hesum føri, so bilførarin fekk koyriforboð og kann sostatt ikki koyra bil aftur fyrr enn hann hevur tikið koyrikortið av nýggjum.
