Tvøroyrar kommuna biður á Facebook, borgarar í kommununi um at hjálpa sær:
Nú summarið fer at halla, er vanliga sera nógv av vespum at síggja. Um til skal bera hjá kommununi at týna vespustovnin, so er umráðandi at fólk boða frá á rætta stað.
HVUSSU STAÐFESTI EG UM TALAN ER UM VESPUBÝLI?
Boðast skal ikki frá, um einstøk vespa kemur inn í húsini. Tó, er hetta ein afturvendandi trupulleiki, so kundi bent á, at vespubýli er nærindis.
Vespur gera sær ofta býli undir takúthangi, millum skins og hold á bygningum, á loftum, í hjallum, undir væðingum og í jarðholum.
Sært tú hópin av vespum støðugt koma og fara frá sama staði, so er lætt at staðfesta, at talan er um vespubýli.
HVUSSU BOÐI EG FRÁ?
Tað er sera týdningarmikið at tú ikki sjálv/ur fer í gongd við at oyðileggja býlið, tí vespurnar tá loypa á beinanvegin. Starvsfólkið hjá Tvøroyrar kommunu hevur alla neyðuga útgerð, og royndir, til at týna vespur.
Send teldupost til Tvøroyrar kommunu á [email protected], við yvirskriftini «Fráboðan um vespubýli». Greið frá júst hvar vespubýlið er funnið og viðfest adressu og telefonnummar.
Til ber eisini at senda mynd av staðnum, har vespubýlið er.
