Elias Eleffsen er mitt í einum hørðum endaspælið um svenska meistaraheitið, og við skaðasøguni hjá Eliasi, so hava venjararnir mett, at tað er mest skynsamt at spara Elias í fyrsta dystinum í Russlandi. Elias verður tó við í teimum báðum seinnu dystunum í Føroyum.
Í hansara stað hava landsliðsvenjararnir úttikið Trónd Mikkelsen, sum til dagliga spælir í næstbestu donsku deildini í SUS Nyborg. Tróndur skiftir til fremstu norsku deildina og Viking Stavanger eftir summarsteðgin.
Tróndur spældi sín fyrst A-landsdyst móti Kekkia í mars.
Føroyar spæla úti móti Russlandi í Moskva mikudagin 28. apríl, móti Kekkia í Havn fríggjadagin 30. apríl og í havn móti Russlandi sunnudagin 2. mai.
Til ber at keypa atgongumerki til manslandsdystirnar móti Kekkia og Russlandi.
1.000 atgongumerki verða sett til sølu og koma áskoðararnir at sita í tveimum ymiskum pørtum av høllini.
Atgongumerkini kosta 150 krónur og kunnu bert keypast á netinum via leinkju á heimasíðuni hjá HSF.
Føroyar og Kekkia spæla fríggjadagin klokkan 19.45 og Føroyar og Russland sunnudagin klokkan 17. Heimadystirnir verða spældir í høllini á Hálsi.
Kelda: Ári Roach/Hondbóltssamband Føroya
.png){kind=logo}
