Endamálið er at skapa nýggj sambond og menna hugskot, har ymisk fakøki møtast. Fyrilestrarnir eru ein sentralur partur av hesum arbeiði.

Fleiri kend nøvn eru á skránni. Steve Rader, sum hevur bakgrund frá NASA, fer at tosa um nýskapan í eini broytiligari tíð. Ajit Jaokar, sum arbeiðir við tøkni og AI, fer at leggja fram um menning av einum AI-samfelag.

Í vinnuliga partinum luttekur Robin Daniels, sum arbeiðir við branding og marknaðarføring, og fer at greiða frá, hvussu sterk vørumerki verða bygd. Kristine Helen Falgren hevur fyrilestur um strategiskar fyrimunir innan kvantutøkni.

Innan dátu og greining luttekur Jesper Christoffersen, sum vísir, hvussu dátur kunnu brúkast til innlit og betri avgerðir.

Panelkjak við vinnulívsfólkum og íverksetarum

Panelkjak eru eisini ein týðandi partur av skránni. Her luttaka fleiri við bakgrund í vinnu og íverksetan.

Rúnar Reistrup luttekur í kjaki um, hvørt Føroyar kunnu gerast eitt smidligt nýskapanarsamfelag í Evropa. Raja Skogland og Sesselja Reynisdóttir luttaka í kjaki um kapital og samfelagsmenning.

Bogi Bech Jensen er við í kjaki um munin millum fyritøkur, sum eru drivnar av stovnum, og tær, sum eru drivnar av stovnarum.

AI og framtíðar tøkni í miðdeplinum

Vitlíki er eitt høvuðsevni í fleiri fyrilestrum.

Ólavur Ellefsen, sum arbeiðir við vinnu og ráðgeving, fer at vísa, hvussu sama AI kann geva ymisk úrslit. Kayla-Megan Burns setir spurningin, um AI kann skapa eina nýggja skapandi rørslu.

Eisini luttekur Heini Zachariassen, sum er íverksetari, við fyrilestri um at byggja fyritøku í eini tíð við AI.

Fyrilestrarnir eru partur av einari breiðari skrá. Listafólk og tónleikarar luttaka eisini, og fleiri fyritøkur sýna fram síni hugskot og loysnir.

TONIK er síðani 2023 ment til eina altjóða ráðstevnu, sum bindur Føroyar saman við altjóða vinnu og tøkni.