Tá ið TB síðsta vikuskifti tapti 5-0 á heimavølli ímóti KÍ, var tað lokali Allan Smedemark, sum hevði ábyrgd av heimaliðnum. Tað hevur verið bíðað eftir, hvør fór at avloysa Sonna Óla Djurhuus, sum legði frá sær fyri stuttum.

Nú hevur TB sett nýggjan venjara.

TB formaðurin André Dalfoss váttar fyri bolt.fo, at felagið hevur skrivað undir sáttmála við danska venjaran Thomas Thinggaard. Hann er 38 ára gamal, og hevur áður arbeitt í Føroyum. Tað var í 2017 og inntil á sumri í 2018, tá ið hann var fótbóltsmennari hjá FSF.

Síðstu tíðina hevur hann verið hjálparvenjari í Vendsyssel, sum spælir í næstbestu donsku deildini.

Leygardagin fer TB at spæla á útivølli ímóti B68. So verður landsliðssteðgur, og sambært tí, sum bolt.fo veit at siga, so fer danski venjarin at taka við starvinum í Trongisvági 8. juni.

Fyrsti dysturin hjá nýggja venjaranum verður 14. juni, tá ið TB fær vitjan av Víkingi.