Landsstýrismaðurin í barnamálum, Djóni Nolsøe Joensen, gongur ikki við tonkum um at geva teimum børnum og ungum, sum eru send av landinum á stovn, um ein almenna umbering
Tað segði hann í Løgtinginum í gjár.
Liljan Weihe, løgtingskvinna fyri Tjóðveldi, vildi hava hann at greiða frá, hvussu nógv børn og ung eru send av landinum síðani apríl 1975, tá umsitingin av barnaforsorgini bleiv flutt til Føroyar?
Hon spurdi eisini landsstýrismannin um tey eiga at fáa eina almenna umbering fyri at vit hava sent tey til Danmarkar.
Djóni Nolsøe Joensen ivast í um tað ber til at fáa tey neyvu tølini heilt aftur í tíðina. Men annars tekur hann undir við, at ein kanning verður sett í verk av hesum øki fyri at fáa greiði á, akkurát hvat tað var, sum gekk fyri seg
Men at hann skal biðja tey um eina almenna umbering vegna føroyskar myndugleikar, ivast hann í.
Sjálvur er hann pedagogur og í tí sambandi hevur hann fylgt børnum niður á stovn, og har tey hava fingið góða hjálp.
Men tað eru eisini dømi um, har tað hevur gingið illa.
– Tí er tað ikki sjálvsagt fyri meg at biðja tey um eina almenna umbering - eisini tí at vit eru framvegis ikki ordiliga komin á mál, tí enn hendir tað seg enn í einstøkum førum, at vit senda børn á stovn í Danmark, sigur hann.
Í dag eru trý føroysk børn á stovni í Danmark.
Men hann heldur eisini, at tað ber ikki til at samanbera støðuna fyrr, tá ið menningartarnað vórðu send av landinum, og støðuna í dag.
Tey børn, sum nú verða send av landinum, hava so stórar, og fjølbroyttar trupulleikar, at vit hava ikki fakligan førleikan at hjálpa teimum - og tá kunnu vit skjótt gera størri skaða enn gagn.
Tí vildi hann heldur, at føroyskir myndugleikar leggja trýst á seg sjálvar fyri at fáa skipa teir stovnar, sum krevjast, so at vit ikki hava fyri neyðini at senda børn av landinum, tí hann heldur, at tað eiga vit ikki at gera.
