Mánadagin varð ringt til løgregluna at melda, at ein vøruvognur var stolin í Havn.

Hann hevði staðið á parkeringsplássinum við Ovaravølli Gundadali síðani leygardagin, men tá ið eigarin skuldi brúka bilin aftur mánadagin, var hann horvin.

Fleiri starvsfólk høvdu atgongd til bilin, men tá ið eingin teirra hevði verið eftir bilinum, meldaðu tey, at hann varð stolin.

Lyklarnir lógu í bilinum, so tjóvurin hevði lætt spæl. Men í gjár varð bilurin so funnin aftur - á havnarlagnum í Miðvági.

Løgreglan sigur, at fyribils hava tey ikki lagt merki til, at nakað var komið upp á hann.

Eigarin hevur fingið boðini, men trupulleikin er, at lyklarnir eru horvnir.

Eingin er skuldsettur fyri stuldurin. Løgreglan arbeiðir við ymsum møguleikum, men enn er tað ikki nokk til at skuldseta nakran.

Men tann, sum læt lyklarnar liggja eftir í bilinum, fær 1.000 krónur í bót fyri ikki at hava tryggjað bilin soleiðis, at hann ikki kundi stjalast.