Skotski landsliðsvenjarin, Steve Clarke, ávarar sínar landsmenn um ikki at undirmeta Føroyar og Moldova. Hetta, tí Skotland ofta hevur havt tað trupult móti minni tjóðum.

- Eg minnist, at eg hugdi eftir landsdystinum millum Føroyar og Skotland (í undankappingin til EM-endaspælið í 2004 á Toftum í 2002). Eg hugsaði við mær sjálvum, at hetta ber ikki til! Men soleiðis er fótbóltur og tílíkt kann henda. Vit eru noydd at vera varin og hava virðing fyri øllum liðum, sigur skotski landsliðsvenjarin í viðtalu við Glasgow Times. 

Hóast skotskir miðlar lata væl at lutakastinum og vænta, at Skotland eiga at fáa 12 stig móti Føroyum og Moldova, so er skotski landsliðsvenjarin meira varin.

- Sært tú søguliga uppá tað, so hava skotar havt tað trupult móti sokallaðum “smærri” liðum, sigur hann.

- Vit vita, at tá vit spæla á útivølli móti smærri tjóðum, so er tað ikki lætt, heldur Clarke.

Steve Clarke er eins og skotskir miðlar nøgdur við lutakastið, har Danmark og Eysturríki komu úr potti eitt og tvey, men heldur, at bæði liðini hava havt góð úrslit seinastu árini, og tí eru í teimum pottum, tey nú eru í. Skotland var í triðja potti.

- Tað merkir, at tey hava gjørt tað betur enn vit seinnu árini, so vit mugu vera varin móti teimum, sigur skotski landsliðsvenjarin.

- Ísrael kenna vit væl. Teir vunnu móti okkum seinast. Uttan at vera virðingarleysur móti teimum báðum smærri tjóðunum í bólkinum, so haldi eg, at hetta eitt gott lutakast, men tað kann gott gerast eitt farligt lutakast, um vit ikki hava virðing fyri øllum liðum, sigur Clarke at enda.