"Jeffrey Epstein var ikki dripin, hann snýtti ikki framstandandi einstaklingar, og hann hevði ikki ein sonevndan klientlista."

Tað var niðurstøðan hjá amerikanska kanningarstovuni FBI, og amerikanska rættarmálaráðnum í einum felags skrivi í gjár, mánadag.

Niðurstøðan kom eftir at stovnarnir hava gjørt eina umfatandi gjøgnumgongd av prógvunum, sum vóru savnaði inn móti Epstein.

Hann var tikin í varðhald í 2019. Tá bleiv hann skuldsettur fyri menniskjahandil, og misnýtslu av fleiri heilt ungum gentum.

Seks ár eftir deyða Epsteins, liva samansvørjingar um deyða hansara, og sambandi við rík og valdsmikil fólk framvegis, skrivar AFP.

Eitt tað mest útbreidda av teimum er, at Epstein ikki gjørdi sjálvmorð í sínum kliva, men at hann í roynd og veru varð dripin í fongslinum.

Stovnarnir skriva tó nú

- Eftir drúgva kanning eru kanningarfólk hjá FBI komin til tað niðurstøðu, at Jeffrey Epstein framdi sjálvmorð í sínum kliva, skriva stovnarnir í skrivinum.

Videoupptøkur frá staðnum, har Epstein varð fongslaður, vístu á at eingin einstaklingur kom inn ella royndi at fáa atgongd til klivan hjá honum.

Upptøkurnar fóru fram frá tí at hurðin varð stongd, til líkið varð funnið morgunin eftir, stendur í skrivinum.

- Umfatandi gjøgnumgongdin vísir heldur ikki nakran inkriminerandi klientlista, stendur í ritinum. Eingin trúverdig prógv vórðu funnin fyri, at Epstein snýtti framstandandi einstaklingar, stendur víðari.

Ein av teimum serliga framstandandi einstaklingunum, sum hevur verið knýttur at Epstein, er bretski prinsurin Andrew.

Í 2019 segði hann seg úr embætisstarvinum, eftir at vinarlagið við amerikanska handilsmannin var av.

Ghislane Maxwell, sum var unnusta hjá Epstein, var í 2021 funnin sek í at hava rekrutterað og manipulerað gentur til at hava samlegu við Epstein.

Hon situr í løtuni í fongsul í 20 ár fyri hettar.