Landsstýrismaðurin í almanna- og mentamálum, Eirikur í Jákupsstovu, og borgarstjórin í Vága kommunu, Bjarni Prior, hava í dag skrivað undir skeyti fyri matrikul í Miðvági.

Fólk við sálarligum og sosialum avbjóðingum fáa nú bygt eitt nýtt sambỳli.

Almanna- og Mentamálaráðið sigur at við støði í frágreiðingini “í góðum hondum”, er talan um eitt týðandi stig í arbeiðinum  at betra um bú- og tænastutilboðini kring landið.

Til ber at geva fólki við serligum tørvi góðar karmar og eitt virðiligt og fjølbroytt lív.

Samstundis royna tey at loysa avbjóðingarnar við starvsfólkatroti á eldra-, heilsu-, almanna- og dagstovnaøkjunum.

Eirikur í Jákupsstovu fegnast um, at arbeiðið í Vágunum nú av álvara kann fara í gongd.

Eisini gleðist hann yvir tað góða samstarvið, sum hevur verið við kommununa

-Tørvurin er greiður, og við hesum taka vit enn eitt fet í tilgongdini at skipa bú- og tænasturnar á almannaøkinum betur, so at bæði hús- og starvsfólk fáa góðar umstøður at virka og liva í,  sigur landsstýrismaðurin Eirikur í Jákupsstovu

Lendis- og skipanarætlan fyri økið verður boðin út í næstum.