Samráðingarnar millum Føroya Skipara- og Navigatørfelag og Føroya Reiðarafelag um nýggjan sáttmála fyri fiskiskipini eru í kvøld slitnaðar úrslitaleysar. Síðan 20. apríl hevur Semingsstovnurin verið uppi í samráðingunum, sum hava verið á Hotel Føroyum.

Partarnir handaðu hvørjum øðrum sáttmálakrøvini 19. mars, so formligu samráðingarnar kundu byrja, men longu eftir bara tveir samráðingarfundi, men longu 9. apríl boðsendi Føroya Reiðarafelag Semingsstovninum. Tá høvdu partarnir bara havt tveir fundir við vanligum samráðingum - teir fundirnir vóru 21. mars og 8. apríl.

Í fyrstu syftu bað Semingsstovnurin partarnar um at leingja sáttmálan til seinasta fríggjadag, 24. apríl, á midnátt.

Semingsmaðurin hevur síðan roynt at funnið glottar, sum kundu verið grundarlag undir einum semingsuppskotið, men í kvøld metti hann altso, at tað var ov langt millum partarnar til at røkka nakrari skilagóðari loysn fyribils, og tí gavst hann við royndunum.

Sáttmálin gongur út á midnátt í annaðkvøld, 1. mai.