Herfyri kundu øll anda lættan tá ið tað varð greitt at maskinmeistararnir við Strandferðsluni - og hjá Havstovuni, ikki fóru í verkfall. Tað var greitt, tá ið Maskinmeistaragelagið og Fíggjarmálaráðið góðtóku eitt uppskot frá semingsmanninum.

Men nú er næsti leikur í talvinum og tað er at fáa semju ímillum skipararnar og stýrimenninar á skipunum hjá Strandferðsluni, og hjá Havstovuni, øðrumegin, og Fíggjarmálaráðið hinumegin.

Terje Sigurðsson, semingsmaður, hevur samráðst við partarnar í eina tíð og nú seinnapartin helt hann, at partarnir høvdu flutt seg so mikið, at hann tað var ómakin vert at leggja eitt semingsuppskot fyri partarnar.

Tað er nú hent, og partarnir hava nú nakrar tímar at viðgera tað, áðrenn teir svara semingsmanninum - og tá fáa vit at vita um tað verður verkfall, ella ikki.