Illa umstríddi umhvørvisfelagsskapurin, Sea Shepherd, hevur verið í Føroyum í fleiri umførum - og nú eru tey aftur her.

Nú um vikuna settu tey nevniliga hol á ársins herferð ímóti grindadrápi. Ársins herferð hjá Sea Shepherd ímóti grindadrápið hevur fingið heitið, Living Fjords, ella Livandi Fjarðir.

Tey siga, at tey fara at verða í Føroyum í fimm mánaðir í ár - men tey boða samstundis frá, at tey hava broytt framferðarhátt.

Tey siga, at tað hevur víst seg, at vanligi framferðarhátturin at leggja seg beinleiðis út í grindadráp, hevur onga ávirkan.

Tí hava tey nú broytt taktikk og sostatt leggja tey nú heldur dent á at samskifta og samstarva við føroyingar - og at fáa føroyingar við í stríðið ímóti grindadrápi.

Samskiftið ímillum Sea Shepherd og føroyingar skal vera virðiligt og samstarvið skal vera konstruktivt og álitisvekjandi, sum tey sjálvi orða seg.

Tað verður ikki við álopum og ábreiðslum, at endi fæst á grindadrápinum. Tað mugu vera føroyingar sjálvir, sum síggja endamálið at enda tað, sigur Sea Shepherd í tíðindaskrivi.

Og tey siga, at nýggi taktikkurin hevur longu borið frukt, tí føroyingar eru meiri sinnaðir at tosað opið og ærliga um viðurskiftini.

Tey siga kortini, at tey fara, enn sum áður, at hava eftirlit við grindadrápum og at skjalfesta tey í alt summar, og út á heystið.