Tað vóru serliga føroyski málverjin Rakul Wardum og miðverjarnir, sum vóru eyðsýndar í 25-21 heimasigrinum móti Portugal.
Í miðverjuni vóru fyri tað mesta liðformaðurin Pernille Brandenborg og Lív B. Zachariasen, og so loysti tvíburasysturin Vár B. Zachariasen av.
Eftir dystin varð Rakul Wardum kosin at vera dagsins spælari.
-Tað gekk væl hjá okkum, og tá ið verjan og miðverjan avrika soleiðis, sum tær gjørdu í kvøld, so eru treytirnar hjá málverjanum góðar, sigur Rakul Wardum.
Og hvussu verður nú?
-Sunnudagin fara vit at spæla í Portugal. Einki er at ivast í, at trýstið á heimaliðið verður sera stórt, og tær fara at leggja nógv fyri móti okkum. Hjá okkum ræður um at avrika soleiðis, sum vit gjørdu í kvøld. Um tað eydnast, og vit vera eitt sindur neyvari og ikki gera mistøk, so eru vónir fyri, at vit kunnu vinna stig og røkka endaspælinum í desember. Tað er stóra málið hjá okkum, sigur Rakul Wardum.
Hon bjargaði 12 av 31 skotroyndum, og tað svarar til 38,71 %. Hin málverjin Annika Fríðheim Petersen bjargaði 1 av 3, og tað svarar til 33,33 %.
